歐債危機無可收拾既後果 (引孫柏文)

孫柏文: 將會非常刺激的8月  

兩個禮拜前，在7月20日，孫柏文用咗支強力《大明燈》咁照出咗一篇題為「擠提在即歐元玩完」嘅文章。裡面我話過，歐洲債務危機，已經到咗無可收拾嘅階段。因為歐債危機，已經唔係嗰啲得幾百萬人口國家，例如愛爾蘭、葡萄牙等嘅「小」事，而係開始蔓延至全球第三大國債市場意大利。 當意大利唔可以喺公開市場借錢，或者要出天價利息先借到錢時，佢哋到期要還舊數之際，就會冇新錢還債。喺咁嘅情況，如果係啲得幾百萬人口嘅小國，歐盟各國領袖、歐洲央行、國際貨幣基金組織(IMF)等，就會開高峰會，開完喺記者招待會到大大聲話：「我哋有實力嘅國家會孭呢條數做擔保！XX國政府會聽聽話話慳啲使！」之後就可以換幾個月嘅穩定，直至被擔保嘅政府又使凸、借唔到錢為止。 不過，如果係意大利，雖然所有官員都會用番同一板斧，又會話：「我哋有實力嘅國家，會孭呢條數做擔保！」不過今次市場就會答：「擔保？唔係話你哋冇誠意，不過只係怕你哋有心冇力。」仲要一路用口答，一路用手拋售手上嘅意大利國債。 多唔好講，淨係滙豐控股(005)喺當地借俾歐豬幾國政府、銀行及企業都有差唔多300億美元(約2,340億港元)，雖然比佢哋當年好神勇咁買咗500億美元(約3,900億港元)美國次按(仲要係冇得攞番層樓嘅二按)債券少，不過，絕對多過佢哋半年賺嘅89億美元(約694億港元) 。 咁喺兩個禮拜前嘅文章中，我話過歐債危機最危險嘅地方，就係持有呢啲債券嘅銀行，被佢哋啲債主(即係存戶)擠提。銀行喺呢個情況之下，唯有進一步拋售手上嘅國債，令債券價格下跌，債息升，國家、政府更難借新錢還舊債，更令舊債走數嘅機會上升，銀行更危險，存戶更快擠提‥‥‥惡性循環。 喺咁嘅情況下，資金流將會非常之難預測。雖然救市嘅方法，都係萬變不離其宗，首先搵個市場覺得比自己更有食力嘅靠山，例如更大嘅銀行，甚至政府。 如果連個政府都唔掂，就搵其他盟友政府，如果連佢哋都頂唔順，就叫央行印銀紙還。不過，最弊就係你唔知佢哋幾時先出手，同出手時會否手腳笨拙，令資產價格進一步雪上加霜。 呢點緊要嘅原因，係就算因為你係我支明燈嘅fan屎，一早已經買白銀同揸cash等機會，你都要記得我個前輩曾經分享過嘅說話：「肥仔，當年1973年，恒指由1,700點跌落來，跌到落400點時，其實死嘅人唔多。死得最多人，係嗰啲仲估400點已見底，衝入市嘅人，因為最後恒指要跌到150點先至見底。 太早入，雖然已避大災，都一樣可以輸清光。」呢個8月將會非常刺激。 作者為前石油業證券分析員，視股市為終生學習，不斷交學費。  

本文章內容之版權由AM730所有。